សម្តេចតេជោ៖លោកត្រាំក្លាហានចេញដឹកនាំពិភពលោកប្រឆាំងព័ត៌មានក្លែងក្លាយដោយផ្តើមពីព័ត៌មានដែលផ្តល់ថវិកាដោយអាមេរិក

បន្ទាប់ពីលោកដូណាល់ត្រាំ បញ្ជារអោយទភ្នាក់ងារសហរដ្ឋអាមេរិកសម្រាប់ប្រព័ន្ធផ្សព្វផ្សាយសកលផ្តាច់ជំនួយរបស់ខ្លួនដល់វិទ្យុអឺរ៉ុបសេរី វិទ្យុសេរីភាព រួមទាំងវិទ្យុអាស៊ីសេរីផងនោះ សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទី នៃព្រះរាជាណាចក្រកម្ពុជា បានថ្លែងថា យើងគួរតែវាយតម្លៃខ្ពស់ចំពោះលោកប្រធានាធិបតី ដូណាល់ ត្រាំ ដែលមានសេចក្តីក្លាហានចេញដឹកនាំពិភពលោក ដើម្បីប្រយុទ្ធប្រឆាំងព័ត៌មានក្លែងក្លាយ ដោយចាប់​ផ្តើមពីបណ្តាញព័ត៌មានដែលផ្តល់ថវិកាដោយរដ្ឋាភិបាលអាមេរិកជាមុន។ នេះជាការរួមចំណែកដ៏ធំដើម្បីលុបបំបាត់ព័ត៌មានក្លែងក្លាយ ព័ត៌មានភូតកុហក លាបពណ៌ អុជអាល ញុះញង់ បង្កចលាចលស្ទើរពេញពិភពលោក ដែលចេញមកពីក្បាលម៉ាសុីនឃោសនាដែលលោកប្រធានាធិបតី ត្រាំ បញ្ឈប់ការផ្តល់ថវិកា។

សម្តេចអគ្គមហាសេនាបតី តេជោហ៊ុន សែន បានមានប្រសាសន៍ថា ដូចខ្ញុំបានជំរាបអង្គប្រជុំអាស៊ាន អាមេរិកចំពោះមុខលោកប្រធានាធិបតី ត្រាំ នៅហ្វីលីពីនឆ្នាំ២០១៧ថា ការមិនទុកលើអាមេរិកដោយប្រទេសមួយចំនួន វាក៏មានចំណែកចេញមកពីប្រព័ន្ធផ្សព្វផ្សាយអាមេរិក ដែលធ្វើឲ្យប្រទេសទាំងនោះយល់ច្រឡំថា ជាគោលជំហររដ្ឋាភិបាលអាមេរិក។

ចរិតមាយាទ និងសំដីនៃអ្នកយកព័ត៌មាន និងអ្នកនិយាយព័ត៌មានមួយចំនួនតូចនៃបណ្តាញព័ត៌មាននេះឫកធំជាងប្រមុខរដ្ឋ ឬប្រមុខរដ្ឋាភិបាលទៅទៀត គ្មានគុណធម៌ និងសីលធម៌ទេ។ សម្តេចតេជោ សម្តែងការកោតសរសើរ និងអរគុណលោកប្រធានាធិបតី ដូណាល់ ត្រាំ។

សូមជម្រាបថា កាលពីថ្ងៃទី១៥ ខែមីនា ឆ្នាំ២០២៥ លោកដូ ណាល់ត្រាំ ប្រធានាធិបតីអាមេរិក បានចុះហត្ថលេខាបញ្ជាឱ្យនាយក និងបុគ្គលិកវិទ្យុសំឡេងសហរដ្ឋអាមេរិក (Voice of America) ស្ទើរតែទាំងអស់ដែលមានចំនួនសរុបប្រមាណ១,៣០០នាក់ ឈប់សម្រាកពីការងារ។  ចំពោះបុគ្គលិកដែលត្រូវបានបញ្ឈប់ពី ការងារនោះរួមមានអ្នកសារព័ត៌មាន ផលិតករ និងជំនួយការសរុបចំនួន១,៣០០នាក់ ដែលធ្វើឱ្យស្ថាប័នប្រព័ន្ធផ្សព្វផ្សាយដែលដំណើរការផ្សាយព័ត៌មានស្ទើរតែ៥០ភាសា ត្រូវផ្អាកប្រតិបត្តិការ៕ ដោយ៖ ភ័ក្រ្តា