ក្រុមហ៊ុនEvercore Asia ចាប់អារម្មណ៍វិស័យថាមពលកើតឡើងវិញ សុខាភិបាល និងវិស័យទេសចរណ៍នៅកម្ពុជា

លោក Keith Magnus ប្រធានក្រុមហ៊ុន Evercore Asia បានកោតសរសើរភាពជោគជ័យនៃការអភិវឌ្ឍរីក
ចម្រើនលើគ្រប់វិស័យរបស់កម្ពុជា និងបានវាយតម្លៃខ្ពស់ចំពោះការដាក់ចេញនូវយុទ្ធសាស្ត្របញ្ចកោណ-ដំណាក់
កាលទី១ របស់រាជរដ្ឋាភិបាល ដើម្បីឈានទៅសម្រេចបាននូវចក្ខុវិស័យកម្ពុជាឆ្នាំ២០៥០។ ទន្ទឹមគ្នានេះលោកប្រធាន
ក្រុមហ៊ុន ក៏បានគោរពជម្រាបជូនសម្ដេចបវរធិបតី អំពីដំណើរការអាជីវកម្មរបស់ក្រុមហ៊ុន និងបានបង្ហាញអំពី
ចំណាប់អាម្មណ៍របស់ក្រុមហ៊ុន ក្នុងការជំរុញកិច្ចសហប្រតិបត្តិការជាមួយកម្ពុជា លើវិស័យថាមពលកកើតឡើងវិញ, វិស័យសុខាភិបាល និងវិស័យទេសចរណ៍។ លោក Keith Magnus ថ្លែងបែបនេះ ក្នុងឱកាសចូលជួបសម្ដែងការគួរសម និងពិភាក្សាការងារ ជាមួយសម្តេចធិបតី នាយករដ្ឋមន្រ្តី កាលពីរសៀលថ្ងៃទី០៨ ខែមករា ឆ្នាំ២០២៥។

យ៉ាងណាជាការឆ្លើយតប សម្ដេចបវរធិបតីបានសម្តែងនូវក្តីសោមនស្សរីករាយចំពោះចំណាប់អារម្មណ៍របស់ក្រុមហ៊ុន និងគូសបញ្ជាក់ពីការដាក់ចេញនូវគោលនយោបាយអភិវឌ្ឍវិស័យថាមពលរបស់កម្ពុជា ដោយកម្ពុជាបច្ចុប្បន្នកំពុង
ប្រើប្រាស់ថាមពលកកើតឡើងវិញចំនួនជាង ៦២ភាគរយនិងបានដាក់គោលដៅឆ្ពោះទៅសម្រេចការប្រើប្រាស់ថាមពលកកើតឡើងវិញឱ្យបាន៧០ភាគរយនៅឆ្នាំ២០៣០។

ក្នុងឱកាសនោះ សម្តេចនាយករដ្ឋមន្រ្តី ក៏បានគូសបញ្ជាក់ពីការដាក់ចេញគោលនយោបាយគាំទ្រដល់វិស័យសុខាភិបាល
ដូចជាការពង្រឹង និងពង្រីកសេវាសុខាភិបាលនៅក្នុងក្របខ័ណ្ឌទូទាំងប្រទេសផងដែរ។ សម្ដេចបវរធិបតី បានបន្តទៀតថា
កម្ពុជានៅមានសក្ដានុពលលើវិស័យជាច្រើនទៀតដែលក្រុមហ៊ុនអាចពិចារណា​ ដែលរួមមានដូចជា៖ វិស័យកសិកម្ម,
កម្មន្តសាល, ហិរញ្ញវត្ថុ និងធនាគារ។ ជាងនេះទៅទៀត សម្ដេចបវរធិបតី បានលើកទឹកចិត្តឱ្យក្រុមហ៊ុនបន្តពិភាក្សាជាមួយក្រសួង-ស្ថាប័ន និងជំរុញការភ្ជាប់ទំនាក់ទំនង និងកិច្ចសហការរវាងវិស័យឯកជននៅក្រៅប្រទេស និង វិស័យឯកជននៅកម្ពុជា៕ ដោយ៖ ភ័ក្រ្តា