អាជ្ញាធរចុះនឹងដាក់កាំមេរ៉ាចាប់ល្បឿននិងបន្ថែមចំណាំងផ្លាតលើផ្លូវ៦០ម៉ែត្រ!

ក្រោយកើតមានគ្រោះថ្នាក់ចរាចរណ៍នៅផ្លូវ ៦០ម៉ែត្រ នាដើមឆ្នាំ២០២៥ ដែលបណ្តាលឱ្យមនុស្សស្លាប់ និងរបួសធ្ងន់ធ្ងរជាច្រើនករណី និងបន្ទាប់ពីមានប្រជាពលរដ្ឋអ្នកប្រើប្រាស់បណ្តាញសង្គមស្នើឱ្យក្រសួង ស្ថាប័នពាក់ព័ន្ធពិនិត្យលទ្ធភាពក្នុងការដាក់របាំងពុះចែកទ្រូងផ្លូវ ឬធ្វើសួនច្បារពុះចែកទ្រូងផ្លូវនៅផ្លូវ៦០ ម៉ែត្រ ដើម្បីកាត់បន្ថយគ្រោះថ្នាក់ចរាចរណ៍រួចមក កាលពីសៀលថ្ងៃទី១២ ខែមករា ឆ្នាំ២០២៥ លោក ឃួង ស្រេង អភិបាល នៃគណៈអភិបាលរាជធានីភ្នំពេញ រួមទាំងរដ្ឋមន្រ្តីក្រសួងសាធារណៈការ និងដឹកជញ្ជូន បានចុះទៅអប់រំណែនាំផ្សព្វផ្សាយអំពីច្បាប់ចរាចរណ៍ជូនពលរដ្ឋ និងសិក្សា
ពីស្ថានភាពផ្លូវ ៦០ម៉ែត្រ ក្នងការដាក់កាំម៉េរ៉ាចាំចាប់ល្បឿន ក៏ដូចជាបន្ថែមចំណាំងផ្លាតលើដងផ្លូវឱ្យមានភាពងាយស្រួល
ក្នុងការធ្វើដំណើរទាំងពេលយប់ និងថ្ងៃដើម្បីកាត់បន្ថយគ្រោះថ្នាក់ចរាចរណ៍។

ក្នុងឱកាសនោះដែរ លោក ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន បានអំពាវនាវដល់ប្រជាពលរដ្ឋ
ធ្វើដំណើរតាមផ្លូវឱ្យចូលរួមគោរពច្បាប់ចរាចរណ៍ ពាក់មួកសុវត្ថិភាពពេលបើកបរម៉ូតូ ពាក់ខ្សែក្រវាត់ពេលបើកបររថយន្ត និងកុំជិះបញ្ច្រាសផ្លូវដើម្បីបង្ការគ្រោះថ្នាក់ចរាចរណ៍ ក៏ដូចជាចូលរួមចំណែកកាត់បន្ថយគ្រោះថ្នាក់ចរាចរណ៍ផងដែរ៕ ដោយ៖ ភ័ក្រ្តា